«Рахат» Қазақстанның Экспорттық сақтандыру агенттігінің қолдауымен экспорт көлемін арттырып жатыр
Кәмпиттер мен "Қазақстан" шоколады Еуропа мен АҚШ-та қолжетімді болды. Қазақстандағы ең ірі кондитерлік өнім өндірушісі – «LOTTE Rakhat» АҚ экспорттық бағытын белсенді дамытып, жеткізу географиясын кеңейтіп, жаңа өнімдерді сыртқы нарыққа шығарып жатыр. Бұл табысқа компания Қазақстанның Экспорттық сақтандыру агенттігімен ынтымақтастығы арқасында қол жеткізуде, деп хабарлайды NUR.KZ тілшісі.
Қазақстанның Экспорттық сақтандыру агенттігі (Бәйтерек ұлттық басқарушы холдингі» АҚ-ның еншілес ұйымы) ұйымдастырған баспасөз туры аясында журналистерге «Рахат» фабрикасының өндірістік қуаты таныстырылды.
Халықаралық нарықтарға шыға бастаған сәттен бастап, «Рахат» өзін сенімді жеткізуші ретінде танытып қана қоймай, экспорт көлемін айтарлықтай арттырды. Бүгінде компания өз өнімдерін Ресей, АҚШ, Германия, Қытай, Өзбекстан, Тәжікстан, Қырғызстан және тағы басқа елдерге табысты жеткізуде. Жалпы экспорт географиясы 10 елден асады.
2014 жылдан бастап компания «Қазақстанның Экспорттық сақтандыру агенттігі» АҚ-мен табысты ынтымақтастық орнатып келеді. Агенттік отандық өңделген өнім экспорттаушылары немесе олардың шетелдік серіктестері тап болуы мүмкін шығын тәуекелдерін сақтандырып, экспорттық келісімшарттарды іске асыру кезінде экспорттаушы мен импорттаушы арасындағы қаржылық өзара іс-қимыл жағдайларын жақсартуға жәрдемдесіп отыр.
«LOTTE Rakhat» АҚ экспортты дамыту жөніндегі директоры Камиль Миррахимовтың айтуынша, компания — кондитерлік өнім өндіру және сату саласындағы көшбасшылардың бірі. Бүгінде кәсіпорын 400-ден астам өнім түрін ұсынады. Әрбір нарыққа жекелеген тәсіл қажет, себебі әр елдің тұтынушыларының талғамы әртүрлі. Мысалы, Ресейде карамель өнімдері кең сұранысқа ие болса, Өзбекстанда шоколадты кәмпиттер көп тұтынылады. Ал «Қазақстан» шоколады әлемнің кез келген нүктесінде сәтті қабылданады.
Дегенмен компания мұнымен тоқтап қалмай, Қазақстанның Экспорттық сақтандыру агенттігінің қолдауымен экспортты одан әрі белсенді түрде дамытып келеді. Биылдың өзінде «Рахат» кондитерлік фабрикасына Агенттік тарапынан 7 миллиард теңгеден астам сомаға қолдау көрсетілді. Бұл қолдау экспорттық жобаларды іске асыруға бағытталған айналым қаражатын қаржыландыру үшін қажетті тәуекелдерді сақтандыруды қамтиды.
.jpg)
«Экспорт — біз үшін маңызды әрі болашағы зор бағыт. Қазіргі таңда экспорттық өнім жалпы сату көлемінің 20 пайызынан астамын құрайды. Біз өнім жеткізіп отырған елдерден бөлек, Молдова серіктестерімен келісімшартқа қол қойылды, ал Канадамен келіссөздер аяқталу сатысында. Сонымен қатар, біз Біріккен Араб Әмірліктері мен Таяу Шығыс елдерінің нарығына шығуды жоспарлап отырмыз.»
2014 жылдан бастап біз барлық ірі экспорттық клиенттермен табысты түрде дәл Қазақстанның Экспорттық-кредиттік агенттігі арқылы жұмыс істеп келеміз. Биыл біз ЭКА-мен ірі келісімшарт жасастық, себебі Агенттік тек бізге ғана емес, сонымен қатар біздің серіктестерімізге де дамуға көмектеседі — олар біздің өнімімізді ғана алып қоймай, ЭКА-ның қолдауымен осы өнімге қаржыландыру алуға да мүмкіндік алады.
Қазір біз Агенттікпен төлемді кейінге шегеру мүмкіндігін беретін бағдарлама аясында жұмыс істеп жатырмыз, бұл ретте біздің тәуекелдеріміз сақтандырылған. Сомалар Агенттікпен келісіліп бекітіледі, бұл белгіленген лимиттер шегінде жұмыс істеуге мүмкіндік береді. Осылайша, біздің клиенттер сатып алу көлемін кеңейтіп, өз сату нарығын дамытуға жағдай жасай алады», – деді «ЛОТТЕ Рахат» АҚ экспортты дамыту директоры Камиль Миррахимов.
Айта кету керек, «Рахат» фабрикасы Қазақстан экспортының дамуына үлес қосып қана қоймай, сонымен қатар жұмыс орындарын құруға да белсенді атсалысуда – бүгінде кәсіпорында 2 500-ден астам адам еңбек етеді. Бұған қоса, компания Алматы қаласындағы ең ірі салық төлеушілердің ондығына кіреді және жыл сайын ел бюджетін толықтырып, экономикалық ахуалдың жақсаруына және әлеуметтік инфрақұрылымның дамуына ықпал етуде.
«Рахат» өндірістік қуаттарын және өнім түрлерін де қарқынды түрде дамытып келеді. Мысал ретінде, Шымкент қаласында заманауи жабдықталған вафли, батончик және мармелад өндіретін жаңа филиалдың ашылғанын айтуға болады.
Экспорттық кредиттік агенттіктің Алматы қаласындағы филиалының директоры Алмас Қалқаевтың айтуынша, бүгінде «ЛОТТЕ Рахат» акционерлік қоғамының 10 шетелдік контрагенті сақтандырылған.
«Бекітілген лимиттер көлемі бойынша компания шамамен 12% мөлшерлемемен жеңілдетілген қаржыландыруға үміт арта алады. Бұл өз кезегінде өнімді төлемді кейінге қалдыру шартымен жеткізуді кассалық үзіліссіз жүзеге асыруға мүмкіндік береді. Мұндай мүмкіндік компанияның сыртқы нарықтардағы бәсекеге қабілеттілігін арттырады», – деп атап өтті Алмас Қалқаев.
.jpg)
Оның айтуынша, экспортқа шыққан қазақстандық өндірушілер шетелдік серіктестердің төлемді кейінге қалдыру талабына байланысты бірқатар тәуекелдерге тап болуы мүмкін. Алайда, ЭКА болашақ контрагенттердің сенімділігін алдын ала тексеріп, отандық жеткізушілердің тәуекелдерін сақтандырады.
"Жыл сайын Қазақстанда дайын өнім өндірісі артып келеді. Біз компаниялардың экспорт көлемі мен географиясын кеңейтуіне мүмкіндік беріп, олардың дамуына барынша қолдау көрсетеміз", – деп түйіндеді спикер.
Айта кету керек, өткен жылы қазақстандық экспорттаушыларға көрсетілген қолдау көлемі рекордтық деңгейге жетіп, 337,4 млрд теңгені құрады, ал жалпы экономикалық тиімділік 2,5 трлн теңгеге жетті. 2024 жылы ЭКА қолдауын 96 экспорттаушы алды, олардың 15-і – жаңа клиенттер.
Экспортты дамытуға қолдау алу үшін қазақстандық кәсіпкерлер экспорттаушының жеке кабинеті арқылы онлайн-платформада цифрлық өтінім беріп, келісімшарттың шарттарын келісуге мүмкіндік алады.
Платформа «бір терезе» қағидасы бойынша жұмыс істейді және Bgov бизнеске қолдау көрсету порталы мен «Бәйтерек» холдингінің байланыс орталығымен біріктірілген. Экспорттаушы жеке кабинетте Агенттікке бекітілген менеджермен онлайн режимде байланыса алады. ЭКА-ға жүгіну үшін экспорттаушының жеке кабинетіне кіріңіз – online.kazakhexport.kz.
